ပါမောက္ခချုပ်ဆရာတော် ဖြေကြားတော်မူသော မိဘကျေးဇူးနှင့်ပတ်သက်သော ဓမ္မရေးရာအမေးအဖြေများ

 

ပါမောက္ခချုပ်ဆရာတော် ဖြေကြားတော်မူသော မိဘကျေးဇူးနှင့်ပတ်သက်သော ဓမ္မရေးရာအမေးအဖြေများ

ကျေးဇူးတော်ရှင် ပါမောက္ခချုပ်ဆရာတော်ကြီးရဲ့ တရားတော်တွေထဲကမှ ထူးထူးခြားခြား လူငယ်တွေရဲ့ မေးမြန်းမှုကို စိတ်ရှည်လက်ရှည်ပြန်လည် ဖြေကြားပေးတဲ့ တရားတော်ကို နာကြားခဲ့ရပါတယ်။ ၂၀၁၆ နိုဝင်ဘာလ 27 ရက်နေ့က ကျင်းပခဲ့သည် တရားပွဲမှာ မန္တလေးမြို့ CAE ကိုယ်ပိုင်အထက်တန်းကျောင်း ကျင်းပခဲ့တဲ့ တရားပွဲမှာ ကျောင်းသားကျောင်းသူများရဲ့ ဓမ္မမေးခွန်းများ (ဝါ)မေးမြန်းမှုများကို ၁၃၇၈ ခုနှစ် တပို့တွဲလဆန်း (၈) ရက် ၂၀၁၇ ခုနှစ် ဖေဖော်ဝါရီလ (၄) ရန်ကုန်တိုင်းဒေသကြီး၊ လှည်းကူးမြို့နယ်၊ ငါးဆူတောင်ဒေသက ဓမ္မဝိနိယစင်တာ IDE ဓမ္မပညာသင်တန်းကျောင်းကနေ ဆရာတော်ကြီးက ပြန်လည်ဖြေကြားပေးခဲ့တဲ့ တရားတော်တွေဖြစ်ပါတယ်။ တရားတော်တွေများဟာ အပိုင်းသုံးပိုင်းရှိပြီး အဲဒီ အပိုင်းသုံးခုထဲက မေးခွန်းတွေကို ဒီစာစုမှာ ပြန်လည် ဖော်ပြလိုပါတယ်။ မိဘကျေးဇူး၊ မိဘကိုဘယ်လိုကျေးဇူးဆပ်ရမလဲ အစရှိသဖြင့်
မိဘကျေးဇူးနဲ့ပတ်သက်ဆက်ဆိုင်တဲ့ မေးခွန်းတွေကို ရွေးပြီး ထုတ်နှုတ်တင်ပြပေးလိုက်ပါတယ်။
ကလေးငယ်တွေရဲ့ တရားအပေါ်စူးစမ်းမှု (ဝါ) ကလေးငယ်တွေရဲ့ လောကကိုမြင်ပုံနဲ့ ဆရာတော်ဘုရားကြီးရဲ့ ပညာဉာဏ်ပြည့်ဝမှုနဲ့ ဖြေကြားမှုတွေဟာ ဒီအမေးအဖြေတွေကို ပိုပြီး စိတ်ဝင်စားစရာကောင်းစေပါတယ်။ အထူးသဖြင့် ဆရာတော်ကြီးရဲ့ ဖြေကြားမှုတွေ (ဝါ) အဖြေတွေကို ကျွန်တော်တို့ရဲ့ နေ့စဉ်ဘဝတွေထဲမှာ အသုံးချနိုင်အောင် ကြိုးစားရင် ကုသိုလ်တရားနဲ့ နီးသထက်နီးနိုင်တယ်လို့လည်း ယုံကြည်ရပါတယ်။
မေးခွန်းနဲ့အဖြေတွေကို ပြန်လည်ဖော်ပြတဲ့နေရာမှာ မေးမြန်းသူရဲ့အမည်ကို ထားခဲ့ပြီး မေးခွန်းနဲ့ ဆရာတော်ကြီးရဲ့ အဖြေများကိုသာ ပြန်လည်ဖော်ပြပေးလိုပါတယ်။ ရည်ရွယ်တာကတော့ ဆရာတော်ကြီးနဲ့ အမေးအဖြေသဘောမျိုးအဖြစ်နဲ့ မေးခွန်းတွေအပေါ်မှာ အခြားအရာတွေ မရှုပ်ထွေးစေဘဲ မြင်ရဖို့ ပါပဲ။
❑ မေး- မိဘကို ကျေးဇူးဆပ်နိုင်သော သားသမီးကောင်းဆိုတာ ဘယ်လိုမျိုးပါလဲ။
မိဘကို ကျေးဇူးဆပ်ကတည်းက သားကောင်းသမီးကောင်းလို့ ဒီအရည်အချင်းအားဖြင့် ပြောလို့ရပြီပေါ့။ မိဘကို ကျေးဇူးဆပ်တယ်ဆိုတဲ့ရှုထောင့်ကနေပြီးကြည့်မယ်ဆိုရင် သူက သားကောင်း သမီးကောင်း၊ သို့သော် မိဘကို ကျေးဇူးဆပ်ရုံနဲ့ သားကောင်းသမီးကောင်းလို့ ဆိုနိုင်သေးတာမဟုတ်ဘူး။ လူတော်လူကောင်းဖြစ်ဖို့ရာ ကိုယ်ကျင့်သီလ လိုအပ်တယ်။ ကိုယ်ကျင့်သီလရှိမှ လူတော်လူကောင်းဖြစ်မယ်။
မိဘကျေးဇူးဆပ်ရုံနဲ့တော့ မိဘရှုထောင့်ကကြည့်ရင် လူတော်လူကောင်းလို့ ပြောလို့ရနိုင်ပေမယ့် ကိုယ်ကျင့်သီလ ပျက်ပြားနေရင်တော့ လူတော်လူကောင်းမဖြစ်နိုင်ဘူး။ သားကောင်း သမီးကောင်းမဖြစ်နိုင်ဘူး။
သားကောင်း သမီးကောင်းဆိုတာ မိမိကိုယ်တိုင်ကောင်းမြတ်တဲ့အရည်အချင်းတွေ ရှိဖို့လိုအပ်တယ်ပေါ့။ မိဘကိုလည်းကျေးဇူးဆပ်မယ် မိမိကိုယ်တိုင်လည်းကိုယ်ကျင့်တရားကောင်းမယ်။ စိတ်နေသဘောထားတွေကောင်းတယ်၊ ဘယ်သူ့အပေါ်မှ မလိုမုန်းထားမရှိဘူးဆိုရင်တော့ ဒါဟာ သားကောင်း သမီးကောင်းလို့ပြောရမှာ၊ လူတော်လူကောင်းလို့ ပြောရမှာပေါ့။
❑ မေး- တရားဓမ္မများနဲ့ မိဘကျေးဇူးဆပ်နိုင်ပါသလား။
တရားဓမ္မနဲ့ကျေးဇူးဆပ်ပုံကို အပေါ်က မေးခွန်းမှာ ဖြေလိုက်တယ်။ တရားဓမ္မနဲ့ ကျေးဇူးဆပ်တာဟာ ကျေးဇူးဆပ်ခြင်းမှာ အကောင်းဆုံးလို့ ဒီလိုဆိုတယ်။ ဘာကြောင့်အကောင်းဆုံးလဲဆိုတော့ မိဘရဲ့သဏ္ဍာန်မှာ တရားဓမ္မရသွားမှ မိဘကိုယ်တိုင် သံသရာဝဋ်ဆင်းရဲက လွတ်နိုင်မယ်။ ကောင်းကျိုးချမ်းသာတွေ ရနိုင်မယ်ပေါ့။
ဒါကြောင့်မို့ လုပ်ကျွေးပြုစုပြီး ကျေးဇူးဆပ်တဲ့နည်းကတော့ ဒီတစ်ဘဝတာမျှသာ အကျိုးရှိကောင်း ရှိမယ်ပေါ့။ အကျိုးရှိနိုင်တယ်။ ဓမ္မနဲ့ မိဘသကို ကျေးဇူးဆပ်မယ်ဆိုရင်တော့ တစ်ဘဝမကဘူးပေါ့။ ဒီဓမ္မကို လိုက်နာကျင့်သုံးခြင်းအားဖြင့် မိဘမှာ ကောင်းကျိုးချမ်းသာတွေဟာ တစ်ဘဝမျှမက ဘဝပေါင်းများစွာ နောက်ဆုံးနိဗာန်ထိအောင် အကျိုးရှိသွားနိုင်တယ်။
ဒါကြောင့်မို့ တရားဓမ္မနဲ့ ကျေးဇူးဆပ်တာတော့ အကောင်းဆုံးလို့ ပြောရမှာဖြစ်တယ်။

❑ မေး – တရားဓမ္မနဲ့ မိဘကျေးဇူးဆပ်ရန် နည်းလမ်းရှိပါသလား။
ရှိပါတယ်။ တရားဓမ္မနဲ့ ကျေးဇူးဆပ်တယ်ဆိုတာ အမေ၊အဖေတွေကို တရားနာဖို့ အသိဉာဏ်တွေရဖို့ ဖန်တီးပေးတယ်။ အခုခေတ်ဆိုလို့ရှိရင် တရားဟောထားတဲ့ တရားတိပ်ခွေလေးတွေ ပေးတယ်၊ တရားစာအုပ်တွေပေးတယ်၊ မိဘကို ဖတ်ပြတယ်။ ဓမ္မအသိမရှိသေးတဲ့မိဘတွေကို ဓမ္မအသိရှိလာအောင် အမေအဖေသီလမရှိသေးရင် သီလရှိလာအောင် လှူမှုတန်းမှုမလုပ်နိုင်သေးရင် လှူမှုတန်းမှုလုပ်လာနိုင်အောင် မိဘကိုယ်တိုင်က တရားဘက်ကို မြတ်နိုးလာအောင် ဆပ်တဲ့နည်းကတော့ အကောင်းဆုံးပဲဖြစ်တယ်ပေါ့။
❑မေး-မာတုပိတု အနန္တဂိုဏ်းဝင်တွင် မွေးစားအဖေ၊ မွေးစားအမေတို့ကို ထည့်လို့ရပါသလား။
ထည့်မယ်ဆို ထည့်လို့ရတယ်။ သို့သော် မွေးစားတာနဲ့ မိဘအစစ်နဲ့ကတော့ လုံးဝကြီးတော့ အကုန်တူလို့မရဘူးပေါ့။ဘာကြောင့်မတူဘူးဆိုတာ တစ်ခုပြောပြမယ်။ အမေအဖေအစစ်က လူဖြစ်လာအောင် သူတို့ကခွင့်ပြုခဲ့တာ။ အကယ်၍ သူတို့ခွင့်မပြုခဲ့ဘူးဆိုရင် လူမဖြစ်ဘူး။ သူတို့ခွင့်ပြုပြီးမှ ပြုစုတဲ့ပုဂိုလ်ကျတော့ ကျွေးတဲ့ ကျေးဇူးတော့ ရှိတာပေါ့။ စောင့်ရှောက်တဲ့ ကျေးဇူး၊ ကျွေးတဲ့ကျေးဇူးရှိတယ်။
မြတ်စွာဘုရားက မိဘသနဲ့ပတ်သက်ပြီးတော့ ကျေးဇူးသုံးမျိုးကို ဖော်ပြထားတာရှိတယ်။ ဘာတုန်းဆိုရင် –
အာပါရကာ – ဘေးရန်အန္တရာယ်မရောက်အောင် စောင့်ရှောက်ခြင်း၊
ပေါသကာ – ကျွေးမွေးခြင်း၊ နို့ချိုတိုက်ကျွေး ကျွေးမွေးခြင်း၊
ဣမဿ လောကသ ဓသေတသော – ဒီလောကကို ပြသခြင်း (ဝါ) လူ့ဘဝကို လာခွင့်ပြုခြင်း
အဲဒီ တတိယမြောက်လူ့ဘဝကိုလာခွင့်ပြုခြင်းကတော့ အမေအစစ် အဖေအစစ်နဲ့ပဲဆိုင်တယ်။ အမေမိဘကို အမှီပြုပြီးတော့ ကိုယ်က လူ့ဘဝကို ရောက်ရတာ။ အဲဒီအတွက်ကြောင့် တကယ် အမေရင်း အဖေရင်းကသာ ဒီ လူ့အဖြစ်ကို လာခွင့်ပြုနိုင်တယ်။ ကျွေးတာ မွေးတာကကျတော့ ခုနက မွေးစာအဖေ မွေးစားအမေတို့ကလည်း ကျွေးနိုင်တယ်ပေါ့။
အဲတော့ ဒါကိုကြည့်မယ်ဆိုလို့ရှိရင် အမေရင်းအဖေရင်းက ဒီလောကကိုရောက်လာအောင် ခွင့်ပြုခဲ့တဲ့ပုဂိုလ်၊ လောကကြီးကို တွေ့ဆုံခွင့်ပေးတဲ့ ကျေးဇူးရှိတယ်။ အကယ် ၍ သူတို့က မွေးပြီးတော့ မကျွေးဘူးဆိုရင်တောင်မှ ဒီကျေးဇူးက ဆပ်လို့မကုန်တဲ့ ကျေးဇူးတစ်ခု ကျန်တာကတော့ အာပါရကာ၊ ပေါသကာ စောင့်ရှောက်တယ်၊ ကျွေးမွေးတယ်ဆိုတာကတော့ ဒီမွေးစား အမေအဖေကလည်း လုပ်လို့ရတယ်ပေါ့။
အဲတော့ မတူတဲ့အချက်ကတော့ မွေးစားအဖေအမေသည် ကိုယ့်ကို လူ့ဘဝရောက်အောင် ပို့ပေးတဲ့ သူမဟုတ်ဘူး။ ပို့ပေးသူ မဟုတ်ဘူး၊ ကျွေးသူပဲ၊ စောင့်ရှောက်သူပဲဖြစ်တယ်လို့ ဒီလို ဆိုနိုင်တယ်ပေါ့။
အဲတော့ တန်းတူထားလို့ကတော့ သဘာဝအရ မရနိုင်ဘူးပေါ့။ သို့သော် ကျေးဇူးမရှိဘူးလို့ ပြောတာ မဟုတ်ဘူး၊ ကျေးဇူးရှိတယ်။
❑ မေး- ဖတ်ဖူးသောစာအုပ်များတွင် မြတ်စွာဘုရားသည် မိခင်၏နို့တစ်လုံးဖိုးကျေသည်၊ အချို့က အကုန်ကျေသည်ဟု အမျိုးမျိုးတွေ့ရပါသည်။ ဘယ်ဟာက မှန်ပါသလဲ။
နို့ကို တစ်လုံးဖိုး နှစ်လုံးဖိုးလို့ ဘယ်သူက သတ်မှတ်တာလဲ။ သတ်မှတ်လို့ ဘယ်ရမလဲ။ တစ်လုံးဖိုးက ဘယ်လောက်ယူမှာတုန်း။ နောက်တစ်လုံးဖိုးက ဘယ်လောက်ယူမှာတုန်း။ ဒီလိုသတ်မှတ်ရင်တော့ ဟုတ်တာပေါ့။ ကျွေးတဲ့ကျေးဇူးက မြတ်စွာဘုရားဖြစ်ပြီးတဲ့အခါ အဘိဓမ္မာတရားဟောလို့ မယ်တော်ကြီး သောတပန်ဖြစ်သွားကတည်းက မြတ်စွာဘုရားက မိဘရဲ့ကျေးဇူး ကျေပြီးသားဖြစ်သွားတယ်။ ဓမ္မနဲ့ ကျေးဇူးဆပ်လို့ ကျေတယ်လို့ ပြောတာ။
မြတ်စွာဘုရားကိုယ်တိုင်ကလည်း သုတ္တန်တွေမှာဟောထားတယ်။ ဓမ္မနဲ့ကျေးဇူးဆပ်ရင် ကျေတယ်လို့။ ဒီလိုဆိုတယ်။ ဒါကြောင့်မို့ မိခင်၏ နို့တစ်လုံးဖိုးကျေသည်လို့ ရေးတဲ့စကားဟာ စာမရှိပေမရှိ သူ့ဘာသူ တစ်ဝက်ကျေတယ်လို့ ပြောချင်တာလား၊ သူက။ တစ်လုံးဖိုး၊ နှစ်လုံးဖိုးလို့ စာနဲ့ပေနဲ့ရေးတာမဟုတ်ဘူး။ သူ့ဆန္ဒ၊ သူ့သဘောအတိုင်းပဲ ရေးတာပဲဖြစ်မယ်။ မြတ်စွာဘုရားအနေနဲ့ ပြောမယ်ဆိုရင် မိဘရဲ့ ကျေးဇူး ကျေတယ်လို့ပဲ ပြောရမယ်။
ဘာဖြစ်လို့လဲဆိုရင် ဘုရားရဲ့ တရားကိုနာပြီး မယ်တော်ကြီးဟာ သောတပန်ဖြစ်သွားလို့။
❑ မေး- မိဘကျေးဇူးဆပ်ရာ အကောင်းဆုံးနည်းလမ်းပြောပြပါ။
ခုနက ဓမ္မနဲ့ကျေးဇူးဆပ်တာ အကောင်းဆုံးကျေးဇူးဆပ်နည်းပဲ။
#ငြိမ်းချမ်းသာ စုစည်းပူဇော်သည်