မိဘများက ကလေးငယ်များကို အချိန်ပေးပါ

 

❒ မိဘများက ကလေးငယ်များကို အချိန်ပေးပါ

ကျေးဇူးတော်ရှင် အောက်စဖိုဒ့်ဆရာတော် ဒေါက်တာဓမ္မသာမိ ဟောကြားတဲ့ တရားတော်တွေထဲက မိဘနဲ့ သားသမီးနဲ့သက်ဆိုင်တဲ့ အကြောင်းအရာများကို ကောက်နုတ်ပြီး 'မေတ္တာတရားရဲ့လမ်း၊ အကြောက်တရားရဲ့လမ်း'ဆိုတဲ့ စာစုလေးကို ကျွန်တော် ရေးခဲ့ပြီးဖြစ်ပါတယ်။ အခုဒီစာစုမှာလည်းပဲ ကလေးငယ်များကို မိဘများက နွေးထွေးကြင်နာစွာ ဂရုစိုက်သင့်ကြောင်းကို ဆရာ တော်ဟောပြောတဲ့ တရားတော်တွေထဲက ထုတ်နုတ်တင်ပြချင်ပါတယ်။ အဲဒီလို ထုတ်နုတ်တင်ပြတဲ့နေရာမှာ အမှားအယွင်းပါခဲ့ရင် မူရင်းတရားတော်များကို ဟောပြောတဲ့ ဆရာတော်နဲ့မသက်ဆိုင်ဘဲ ကျွန်တော့်ရဲ့ပေါ့ဆညံ့ဖျင်းမှုသာ ဖြစ်ကြောင်းကိုလည်း ပြောကြားလိုပါတယ်။
အောက်စဖိုဒ့်ဆရာတော်ဟောကြားတဲ့ 'ပျော်နိုင်ပါရက်နဲ့ ပျော်ဖို့မေ့နေသူ များတရားတော်'ထဲမှာ ကလေးတွေက လုံလောက်တဲ့ ဦးနှောက်ဖွံ့ဖြိုးမှု မရှိသေးခင်မှာ စိတ်ခံစားမှုနဲ့ ဆုံးဖြတ်တယ်ဆိုပြီး ဟောကြားတော်မူခဲ့တာကို ရိုသေစွာ မှတ်သားခဲ့ရဖူးပါတယ်။
ကလေးတွေ လူ့လောကကတည်းကို စရောက်ကတည်းက မေတ္တာတရားရဲ့ လုံခြုံနွေးထွေးမှုကို လိုချင်ရှာကြတာပါ။ ကလေးငယ်လေးတွေဟာ သူတို့ရဲ့ ကမ္ဘာလေးကို စိတ်ခံစားမှုနဲ့တည်ဆောက်၊ စိတ်ခံစားမှုနဲ့ပဲလုံခြုံမှုရှာကြရတာပါ။
သူတို့ရဲ့ စိတ်ကူးမှတ်ဉာဏ်အပိုင်းအစတွေထဲမှာ ပျော်ရွှင်စရာတွေ၊ လုံခြုံနွေးထွေးမှုတွေရှိနေရင် ဦးနှောက်ဖွံ့ဖြိုးမှုကလည်း အားကောင်းလာပြီး ဦးနှောက် ဖွံ့ဖြိုးမှုအားကောင်းလာတာနဲ့အမျှ သင်ယူနိုင်စွမ်း၊ စဉ်းစားတွေးခေါ်နိုင်စွမ်းလည်း မြင့်မားလာတယ်လို့ ဆိုရပါလိမ့်မယ်။
ကလေးတစ်ယောက်ရဲ့ စိတ်ခံစားမှုဟာ သူ လူ့လောကကြီးကို စတင်ဝင် ရောက်စဉ်မှာကတည်းက အရေးကြီးတဲ့နေရာက ပါဝင်လာတယ်လို့ ပြောရမှာပါပဲ။
အဲဒါနဲ့ပတ်သက်ပြီး အောက်စဖိုဒ့်ဆရာတော်က ...၊
'သူမွေးမွေးချင်း အမေ့ရဲ့လက်ထဲကို ရောက်သွားတဲ့ကလေးနဲ့ အမေ့ရဲ့လက်ထဲကို ချက်ခြင်းမရောက်သေးဘဲနဲ့ အကြောင်းတစ်ခုခုကြောင့် ဆရာ၊ ဆရာမ တွေလက်ထဲမှာဖြစ်ဖြစ်၊ စက် incubator (လမစေ့ဘဲ မွေးသော ကလးငယ် များအတွက် အနွေးဓာတ်ပေးသောစက်)ထဲဝင်သွားတဲ့ကလေးတွေက Emotional Development (စိတ်ခံစားမှုဖွံ့ဖြိုးတိုးတက်ခြင်း)မှာ ကွာတယ်တဲ့။
ကလေးက သူ အဲဒီအချိန်မှာ ဦးနှောက်ဖွံ့ဖြိုးမှု မရှိသေးဘူး။ ဘာမှ မတွေးတတ်သေးဘူး။ ဒါပေမယ့် အမေရဲ့အသားနဲ့ သူ့ရဲ့အသား ထိထားတာ အဲဒါက သူ့ရဲ့Development (ဖွံ့ဖြိုးတိုးတက်မှု၊ ကြီးထွားရင့်သန်မှု)မှာ အရေးပါတယ်'လို့ ရှင်းလင်းဟောပြောပေးထားပါတယ်။
မေတ္တာတရားရဲ့လမ်းကို ဘဝရဲ့မူလအစဦးနေ့ရက်များမှာ ကတည်းက ငံ့လင့် ကြပုံဟာ ထူးဆန်းလှချည်ရဲ့။ ကလေးငယ်လေးများက မိဘမေတ္တာတရား (ဝါ)မိဘတွေရဲ့ ဂရုစိုက်ကြင်နာမှုကို ဘယ်လိုပင်တောင့်တစေဦးတော့ ကျွန် တော်တို့ဖြတ်သန်းရှင်သန်ကြီးပြင်းရတဲ့ခေတ်ကြီးဟာ ရှုပ်ထွေးပွေလီလှတဲ့ ခေတ်ကြီးမဟုတ်လား။ ကျွန်တော်တို့ဟာ မြို့ပြလူနေမှုစနစ်ကြီးထဲမှာလည်း ရှင်သန် ရဦးမယ်၊ စာဝတ်နေရေးအတွက် ရုန်းကန်ရတဲ့ဘဝတစ်ခုထဲမှာလည်း ကျင်လည် နေရဦးမယ်ဆိုရင်တော့ မိဘများဟာ ကလေးထက် အလုပ်ကို ဦးစားပေးရလေ့ ရှိကြပါတယ်။
အဲဒီလို ဦးစားပေးလိုက်ရတဲ့အတွက် ဖြစ်လာနိုင်တဲ့ အခြေအနေတွေကို ဆရာတော်က အခုလိုရှင်းပြထားပါတယ်။
'ကလေးက နှစ်လသုံးလပဲရှိသေးတယ်၊ တချို့ဆိုရင် တစ်လနှစ်လပဲ ရှိသေးတယ်၊ အမေက ကလေးထိန်းလက်ထဲအပ်ပြီး အလုပ်သွားတယ်ဆိုရင် မိခင်နဲ့ connection (အဆက်အသွယ်)နည်းသွားတယ်။ subconscious mind မသိစိတ်ကနေ မိခင်နဲ့ နှလုံးသားခြင်းဆက်သွယ်မှု နည်းသွားပြီ။
အဲဒီလိုနည်းသွားရင် ကလေးက သူက connection ရှာနေတာ။ အဲဒီ connection က ဂိမ်းဖြစ်ချင်ဖြစ်မယ်၊ သူ့ရဲ့သူငယ်ချင်းဖြစ်ချင်ဖြစ်မယ်။ သူ့ကို အချိန်ပေးတဲ့သူပေါ့။ ဒါကြောင့် ကလေးငယ်သေးတဲ့အချိန်မှာ ကလေးကို အချိန်ပေးဖို့ဟာ သိပ်အရေးကြီးပါတယ်။'
ကလေးက သူ့အတွက် တစ်ခုခုကိုရှာရင်းကနေ နောက်ဆက်တွဲဖြစ်လာနိုင်ချေရှိတာက ဂိမ်းကိုစွဲလမ်းတာ၊ တီဗီအရမ်းကြည့်တာ၊ တယ်လီဖုန်း၊တက်ဘလက်တွေနဲ့ပဲ အချိန်ကုန်တော့တာ ဆိုတဲ့ အာရုံကို တစ်ခုခုမှာအမျှင်မပြတ်အောင် ထားတတ်တဲ့ အလေ့အထကြီးရသွားနိုင်တာပါပဲ။ ဒီဘက်ခေတ် ကလေးအတော် များများမှာ ဒီအလေ့အကျင့်ကြီးက ဘဝဟန်ပန်တစ်ခုလိုကိုဖြစ်နေတာကိုလည်း စိတ်မကောင်းစရာ တွေ့မြင်ရပါတယ်။ ဖျော်ဖြေရေးအာရုံတွေနဲ့ ရှင်သန်ရင်းကပဲ တကယ့်ဘဝထဲက ပတ်ဝန်းကျင်နဲ့ အဆက်အသွယ်ပျက်ပြီး လူသားဆန်မှု ပျောက်ဆုံးသွားမှာက သိပ်ကို စိုးရိမ်စရာကောင်းလှပါတယ်။
လူသားတွေ မဆိုထားနဲ့ဦး၊ တိရစ္ဆာန်တွေတောင်မှပဲ မိခင်ရဲ့ဂရုစိုက်ကြင်နာမှုကိုရတဲ့သူနဲ့ မရတဲ့သူကြားမှာ စိတ်ခွန်အားခြင်းက ကွာခြားလှတာကို တွေ့ရကြောင်းကို ဆရာတော်က အနောက်တိုင်းက သုတေသနပြုချက်များကို ကိုးကားမိန့်ကြားပါတယ်။
'သိပ္ပံပညာရှင်တွေက ခွေးပေါက်စလေးနှစ်အုပ်စုကို လေ့လာကြတယ်။ တစ်အုပ်စုက အမေကအရမ်းကြင်နာတယ်၊ ဂရုစိုက်တယ်။ အခြားတစ်အုပ်စု ကတော့ အမေက လျစ်လျူရှုထားတယ်။
လျစ်လျူရှုထားတဲ့ ခွေးလေးတွေက သူတို့ကြီးလာတဲ့အခါမှာ စိတ်ဖိစီး စရာ နည်းနည်းကလေးတွေ့ရင်ကိုပဲ၊Stress (ဖိစီးမှု၊ ကြောင့်ကြစိတ်၊ သောက)နဲ့တွေ့ရင် စိတ်ဖိစီးမှုဒီဂရီက ချက်ချင်းတက်လာတယ်။Sensitive (စိတ်ထိခိုက်လွယ်) ဖြစ်တယ်။ အမေရဲ့ဂရုစိုက်ခြင်းကိုခံရတဲ့ ခွေးလေးတွေက တော့ တော်ရုံတန်ရုံ Stress ဆိုရင် သူတို့က ဘာမှမဖြစ်ဘူး။'
ဒီလောက်ဆိုရင် မိဘရဲ့မေတ္တာတရားက (ဝါ) ဂရုစိုက်မှုက ကလေးတွေရဲ့ စိတ်ဖွံ့ဖြိုးတိုးတက်မှုမှာ၊ အဲဒီထက်နည်းနည်းလေးပိုပြောရရင် ဖွံဖြိုးတိုးတက်ခြင်းမှာ ဘယ်လောက်အထိအရေးပါတယ်ဆိုတာကို သိနိုင်လောက်ပြီထင်ပါတယ်။ ကျွန်တော်တို့ဟာ ကလေးတွေကို သူတို့ယုံကြည်ရာရာကို လုပ်နိုင်ဖို့အတွက် မေတ္တာတရားရဲ့လမ်းပေါ်ကသာ သွားခိုင်းရမှာပါပဲ။ မေတ္တာတရားရဲ့လမ်းဆိုတာက ကလေးတွေကို အကြောက်တရားနဲ့ အုပ်ချုပ် တာမျိုးမဟုတ်ဘဲ မွေးရာပါဗီဇကိုပဲ တိုးတက်ကောင်းမွန်အောင် ပြုစုပျိုးထောင် ပေးတာမျိုးပါ။ အကြောက်တရားနဲ့ မအုပ်ချုပ်ဘူးဆိုပြီး ဘာလုပ်လုပ် လွှတ်ထားတာမျိုးလည်း မဟုတ်ပြန်ပါဘူး။ မေတ္တာတရားရဲ့လမ်းဆိုတာက သူတို့ ဘယ်လိုရှင်သန်ကြီးပြင်းနေသလဲဆိုတာကို အရိပ်တကြည့်ကြည့် ကြည့်ရင်းကပဲ သူတို့နှလုံးသားနဲ့ မပြတ်ဆက်သွယ်ရင်း မကောင်းတာကို တားမြစ်၊ ကောင်းတာ ကို လမ်းညွှန်နေတာမျိုးပါ။
ဒီစာစုဟာ မေတ္တာတရားရဲ့လမ်းပေါ်ကို ကိုယ့်ရဲ့သားသမီးများ လျှောက်လှမ်းစေနိုင်ဖို့ ဆိုတာဟာ မိဘကများက ကိုယ့်ရဲ့သားသမီးများကို အချိန်လည်းပေး ဂရုလည်းစိုက်ပါမှ ဖြစ်လာနိုင်မယ်လို့ ယုံကြည်ကြောင်းပြောတဲ့ စာပါ။ ဒါ့အပြင် ရှုပ်ထွေးပွေလီလှတဲ့ ခေတ်ကြီးရဲ့တောင်းဆိုမှုကြောင့်ပဲဖြစ်ဖြစ်၊ စာဝတ်နေရေး အတွက်ရုန်းကန်နေရခြင်းကြောင့်ပဲဖြစ်ဖြစ်၊ မြို့ပြလူနေမှုစနစ်ကြောင့်ပဲဖြစ်ဖြစ် ... တစ်စုံတစ်ခုသောအကြောင်းကြောင့် ကိုယ့်ရဲ့ရင်သွေးငယ်လေးများကို ဂရု မစိုက်မိတာ၊ အချိန်မပေးနိုင်တာမျိုး ဖြစ်နေတဲ့ မိဘများအနေနဲ့ ကိုယ့်ရဲ့သား သမီးငယ်လေးများကို အချိန်ပေး ဂရုစိုက်ကြင်နာကြဖို့ တိုက်တွန်းတဲ့စာလည်းပဲ ဖြစ်ပါကြောင်း ...။
#ငြိမ်းချမ်းသာ
၉-၃-၂ဝ၂ဝ
ရည်ညွှန်းကိုးကား/-
အောက်စဖို့ဒ်ဆရာတော် ဒေါက်တာဓမ္မသာမိ
ဟောကြားသောတရားတော်များ ဖြစ်သည့်
၁။ ကထိန်သင်္ကန်း၊ စိတ်ပျော်ရွှင်မှုနှင့် စုပေါင်းစိတ်ဓာတ်(၂-၁၁-၂ဝ၁၉)
၂။ သင်နှင့်ကျွန်ုပ်တို့အတွက် ဗုဒ္ဓ၏အတွေးအခေါ်များ(၁-၁၂-၂ဝ၁၈)