■ မဟာဗောဓိမြိုင်ဆရာတော်ဘုရားကြီး၏
စာပေ၌တွေ့ရသော အယူအဆထူးများ(၄)
❝ရတနာ၏ ယတြာ မည်သည့်အရာမျှ မတုယှဉ်သာ❞
ကျေးဇူးတော်ရှင် မဟာဗောဓိမြိုင်ဆရာတော်ကြီးရဲ့ ကျမ်းစာအုပ်များစွာ ရှိတဲ့အထဲမှာမှ ၂ဝ၁၂ ခုနှစ်က ထုတ်ဝေခဲ့တဲ့ 'နံနက်ခင်းမှာ ရှင်းစရာ (ပုဗ္ဗဏှ ဘာဏက ကထာ) ဆိုတဲ့ ကျမ်းစာအုပ်ဟာ ထူးခြားလှပါတယ်။အဲဒီကျမ်းစာအုပ်နဲ့ပတ်သက်ပြီး ဆရာတော်ကြီးက ... 'မိုးသောက်ကာလ ရောက်ကာနီးတဲတဲ အလိုမျှဖြစ်သော ည၏နောက်ဆုံးယံ၏အဆုံး နံနက် လေးနာရီခန့်တွင် ပုဗ္ဗဏှပရိတ်တော်ရွတ်ဖတ်ရခြင်းအကြောင်းကို ဖွင့်ပြရာ စာစု ဖြစ်၏' (နံနက်ခင်းရှင်းစရာ၊ စာ-၆) လို့ရေးသားထားပါတယ်။
ဖွင့်ပြရခြင်း၏ရည်ရွက်ချက်ကတော့
(၁) အိပ်တဲ့အခါ အိပ်မက်ဆိုးတွေမြင် မက်ရင်
(၂) ငှက်ဆိုးထိုးသံတွေ ကြားရင်
(၃) ဥက္ကာပျံတော်လဲသံတွေကြားရရင် ...အဲဒီလို နိမိတ်ဆိုးတွေကို အာရုံပြုပြီး ပုဗ္ဗဏှသုတ်ရွတ်ကြဖို့ ဖြစ်တယ် လို့ဆိုပါတယ်။
အဲဒီလိုရွတ်ခြင်းအားဖြင့် ...'ထိုမကောင်းသောနိမိတ်ကို ဤဗုဒ္ဓနိမိတ်တို့ ဖြင့် တန်ပြန်ပြီး လင်းချိန်အလုပ်ဆင်းပါလျှင် ကုန်းပေါ် တုန်းကျော်ပြီးသားဖြစ် ရန် မလွဲပြီ။
ဓာတ်ရိတ် ဓာတ်ခင်းတို့တွင် ဗုဒ္ဓဓာတ် ဓမ္မဓာတ် သံဃဓာတ်တို့ဖြင့် စီ ရင်ထားသော ဤ 'ပုဗ္ဗဏသုတ်'ကား အထက်၏ အထက်ဆုံးတည်း။
ယတြာအားလုံးတို့တွင်လည်း ဗုဒ္ဓယတြာ ဓမ္မယတြာ သံဃာ့ယတြာတို့ ဖြင့်ချေပထားသော ဤ'ပုဗ္ဗဏသုတ်'ကား အစွမ်းထက်ဆုံးတည်း' လို့ မဟာ ဗောဓိမြိုင်ဆရာတော်ကြီးက ရေးသားထားပါတယ်။
■ ဝနဝါသီဆရာတော်ကြီးရဲ့ ဓာတ်စကား၊ ယတြာစကား
ဒီစာစုမှာတော့ 'ပုဗ္ဗဏသုတ်'နဲ့ပတ်သက်တဲ့ ဖွင့်ဆိုချက်တွေထက် ဓာတ်နဲ့ ယတြာတွေအကြောင်းကို အကျဉ်းအားဖြင့်ပြောမှာဖြစ်ပါတယ်။ အဲဒီလိုပြောတဲ့ နေရာမှာလည်း ဆရာတော်ကြီးဖွင့်ဆို ရှင်းပြချက်များကိုပဲ အဓိကထား ပြောမှာ ဖြစ်ပါတယ်။ 'ပုဗ္ဗဏသုတ်'နဲ့ပတ်သက်ပြီး ဆရာတော်ကြီးရဲ့ ဖွင့်ဆိုချက် အကျယ်ကို သိလိုပါက 'နံနက်ခင်းမှာရှင်းစရာ' စာအုပ်မှာ ဖတ်မှတ်နိုင်ပါတယ်။
ဓာတ်၊ ယတြာတွေအကြောင်း ပြောနေတာဖြစ်တဲ့အတွက် မဟာဗောဓိမြိုင် ဆရာတော်ကြီးရဲ့ ဘဝဖြတ်သန်းမှုကိုလည်း ဒီနေရာမှာ ဖော်ပြချင်ပါတယ်။
'ငါသည် လူ့ဘဝက သမထအလုပ်ဖြင့် စခဲ့၏။ ဘိုးမင်းခေါင်ဦးဆောင် သော သံခမောက်ဆောင်းလေးယောက်ကောင်းများနှင့် ဆက်မိ၏။ ဤ၌ လေးယောက်ဆိုသည်မှာ ရာကျော်၊ ရက်ကန်းစင်တောင်၊ ဘိုးမင်းခေါင်နှင့် ဘိုးဘိုးအောင်တို့ ဖြစ်ကြသည်။
ထိုလေးယောက်တွင် ...
လူ့ဘဝတစ်လျှောက် ဘိုးမင်းခေါင်က အနီးကပ် စောင့်ရှောက်ပေး၏။
ရဟန်းဘဝတစ်လျှောက် ရက်ကန်းစင်တောင်က အရေးပေါ် စောင့်ရှောက် ပေး၏။
သို့သော် ငါသည် ဘာဂိုဏ်းမှ မဝင်။ ဘာဂိုဏ်းစင်မှ မတက်ခဲ့။ ဂုဏ်တော် မေတ္တာပွား၍ ငါ့စိတ်ငါ့အနားထားရန် အားထုတ်ခြင်းမျှသာ။
တစ်ဖန် သံခမောက်ဆောင်းဆိုသည့် စေတီတော်များ ပြုပြင်ခြင်း၊ အသစ်တည်ခြင်း၊ ထီးတင်ခြင်းဖြင့် သာသနာပြုစုခြင်း၏ အတွင်းစကား။
သည့်နောက် လူ့ဘဝနှင့်ပင် အဘဝိမလထံမှောက် ရောက်ရှိလာသောအခါ အဘ၏ ကပ္ပိယကာရကအဖြစ်ဖြင့် အဘသွားရာလိုက်ပါရ၏။ အဘခိုင်းစေရာ လုပ်ပေးရ၏။ သုံးနှစ်မျှကြာ၏။ သုံးနှစ်ပြည့်မြောက် ထိုသည့်နောက်တွင် ထိုအဘသည် ငါ့အား မဟစည်ရိပ်သာသို့ စခန်းဝင်ရန် မိန့်တော့သည်။ တစ် ကြိမ်နှင့်မသွား ..၊ နှစ်ကြိမ်။ နှစ်ကြိမ်နှင့်မသွား..၊ သုံးကြိမ်။ သည်သို့ သုံးကြိမ်တိုင်တိုင် တိုက်တွန်းလေမှ ငါတို့ သွားဖြစ်ခဲ့ရပါသည်။
မဟာစည်သည် ဝိပဿနာယဉ်ဖြင့် နိဗ္ဗာန်သို့တင်ပို့ပေးနေသည့်စခန်း။
မဟာစည်သည် စာတွေ့နှင့် လက်တွေ့ညှိ၍ အရှိအရှိအတိုင်း မြင်သိစေ သည့်စခန်း။
စည်းကမ်းလည်းကြီး၊ နည်းလမ်းလည်းမှန် အသင်အညွှန်းကလည်း ကျွမ်း ကျင်ပြန်သော ထိုမဟာစည်မှပင် နိဗ္ဗာန်သွားလမ်း ငါတို့မျက်မှန်းတန်းမိခဲ့ရာ ယနေ့တိုင် ထိုလမ်းပေါ်မှ တစ်ဖဝါးမှဖဲ့မနင်းပါ' လို့ 'အသွားမတော်တစ်လှမ်း [လေခက္ခန္ဓကထာ]' မှာ ဆရာတော်ကြီးကိုယ်တော်တိုင် ရှင်းလင်းရေးသားခဲ့ တာကိုတွေ့ရပါတယ်။
ဒီလောက်ဆိုလျှင် တောရပ်မှီ တရားရှာဖွေတဲ့ ဆရာတော်ကြီးက ဘာ ကြောင့် ဓာတ်စကား ယတြာစကားပြောနေသလဲဆိုတာကို ဆဝါး မိလောက် ပြီလို့ ယုံကြည်ပါတယ်။
■ အင်္ဂလိပ်-မြန်မာ အပြန်အလှန်ဆင်ခဲ့ကြတဲ့ ဓာတ်ဆင်ယတြာ
ဓာတ်ရိုက်၊ ယတြာချေထုံးရဲ့ ဦးတည်ချက်ဟာ ဓာတ်တွေကိုရိုက်နှိုးပြီး ကိုယ်ကျိုးအပြုခိုင်းခြင်းနဲ့ ကိုယ့်ဆီဦးတည်လာနေတဲ့ ဓာတ်ဆိုးဒဏ်ကို ခုခံချေ ပပစ်ခြင်းဖြစ်တယ်လို့ ဆရာတော်ကြီးက ဆိုပါတယ်။
ဒါ့အပြင် ဓာတ်ရိုက်၊ ဓာတ်ဆင်၊ ယတြာချေထုံးကို မြန်မာလူမျိုးသာ သုံးကြသည်မဟုတ် လူမျိုးတိုင်းသုံးကြတယ်လို့ ဆိုပါတယ်။
မြန်မာပြည်ကြီး အင်္ဂလိပ်လက်အောက်ကျရောက်ပြီးစအချိန်မှာ ဇာတ် မင်းသားဖိုးစိန်ကြီးကို ဘုရင်အဖြစ် နန်းစည်းစိမ် ၇ ရက်ပေးခဲ့တာရှိခဲ့ဖူးတယ် လို့ သိရပါတယ်။ သီပေါမင်းဟာ ကုန်းဘောင်ခေတ်ရဲ့ ၁ဝ ဆက်မြောက် မင်းဖြစ်ပြီး တဘောင်ကိန်းများအရ ကုန်းဘောင်မင်းဆက် ၁၁ ဆက်ရှိတာကို ချေပခြင်းဖြစ်တယ်လို့ ဆိုပါတယ်။
'တစ်ဖန်မင်းကိုသာ ချေသာပြီး၊ ခေတ်ကုန်းဘောင်ကား ထီးထီးကြီး ကျန်ရှိနေသေးရာ ... ယင်းခေတ် ကုန်းဘောင်ကိုလည်း အင်္ဂလိပ်တို့ပိုင် ဧ ရာဝတီသင်္ဘောတိုင်းဝယ်၊ သင်္ဘောဆင်း၊ ကမ်းကုန်းတက်ပြုလုပ်စရာ ပျဉ်ချပ်ကြီးနှစ်ခုပါရှိမြဲဖြစ်ရာ ယင်းကို ကုန်းဘောင်အမည် ပေးလိုက်ကြသည်။ သည့် နောက် သင်္ဘောများ မြို့ရွာဆိပ်ကမ်းများသို့ ကပ်ရောက်ချိန် 'ကုန်းဘောင်ထိုး' ဤသို့ အရာရှိက အမိန့်ပေး(အမိန့်တော်ပြန်)ပြီးမှ ထိုပျဉ်ချပ်ကြီးနှစ်ခု သင်္ဘောမှနေ ကမ်းဆီသို့ တင်ပေးကြရပါသည်။
တစ်ဖန်ထိုသင်္ဘောများ ထိုမြို့ရွာဆိပ်ကမ်းတို့မှ ခွာလိုသောအခါတွင်လည်း 'ကုန်းဘောင်ချ'၊ ဤသို့ အရာရှိက အမိန့်ပေးပြီးမှသာ ထိုပျဉ်ချပ်ကြီးနှစ်ခု ကမ်းမှ သင်္ဘောသို့ ပြန်နုတ်ပေးကြရပါသည်။
ဤနည်းဖြင့်ပင် ကုန်းဘောင်ခေတ်ကို ပျဉ်ချပ်ကြီးနှစ်ချပ်ဖြင့် ထိုးချေပစ် လိုက်ကြပါသည်' (နံနက်ခင်းမှာရှင်းစရာ၊ စာ-၁၁၇) လို့ ဆရာတော်ကြီးက အနောက်တိုင်းသားများရဲ့ ယတြာကို ရေးသားဖော်ပြထားပါတယ်။
(ကုန်းဘောင်မင်းဆက်ကို 'အလောင်းဘုရား မှ သီပေါမင်း'အထိ ၁၁ ဆက်ဟု ဆိုကြပြီး အချို့ကမူ ၁၁၄၃ ခုနှစ်တွင် နန်းတက်ခဲ့ပြီး ၇ ရက်မျှသာ နန်းစည်းစိမ်ခံခဲ့ရသည့် 'ဖောင်းကားစားမောင်မောင်'ကို ထည့်မတွက်ဘဲ သီပေါမင်းအထိ ၁ဝ ဆက်ဟုလည်း ယူကြသည်များလည်းရှိသည်။
'သစ္စာအကျင့်မှန် ကုသလံသစ္စံ တမံအစောင့်ထား မုဆိုးတစ်ဆယ့်ငါး' ဆိုသည့် တဘောင်အရ ကုန်းဘောင်မင်းဆက် ၁၅ ဆက်ရှိမည်ဟု ဆိုကြ သည်များလည်းရှိသည်။ ယခုစာစုတွင်မူ မဟာဗောဓိမြိုင်ဆရာတော်ကြီး၏ 'နံနက်ခင်းမှာ ရှင်းစရာ'စာအုပ်ပါမူအတိုင်း သီပေါမင်းထိ ကုန်းဘောင်မင်း ဆက် ၁ဝ ဆက်၊ ကုန်းဘောင်မင်းဆက် ၁၁ ဆက်ရှိမည်တဘောင်ကိန်းများက ဆိုသည် ဟုသာ ဖော်ပြခြင်းဖြစ်ပါသည်။)
အင်္ဂလိပ်နယ်ချဲ့တွေဟာ ကုန်းဘောင်ခေတ်ကို ယတြာနဲ့ချေဖျက်တာအပြင် ငွေစက္ကူတွေကို ယတြာဓာတ်ရိုက်အဖြစ်သုံးပြီးလည်း မြန်မာနိုင်ငံကို နှစ်ကာလ ရှည်ကြာအောင် အုပ်ချုပ်ဖို့အတွက် လုပ်ဆောင်ခဲ့တာလည်း ရှိခဲ့တယ်လို့လည်း ဆိုပါတယ်။
'နောက်တစ်ခုမှာ အင်္ဂလိပ်လူမျိုးများ ဤနိုင်ငံကို အုပ်ချုပ်ခွင့်ရမည်မှာ နှစ်အနည်းငယ်မျှ(ခြောက်နှစ်ခန့်ထင်၏)ရမည့် ကိန်းပင်ဖြစ်ပါသည်။ ယင်းကိုလည်း ဂျော့၊ ဝေလ ရုပ်ပုံပါငွေစက္ကူများရိုက်နှိပ်ကာ တစ်ပြည်လုံး အသုံးပြု စေပါသည်။ ရာတန်၊ ငါးဆယ်တန်များအထိ ဖြစ်ပါသည်။ သို့ကြောင့် အင်္ဂလိပ် များ ဤ၌ နှစ်တရာအထိ သက်ဆိုးရှည်သွားကြပါသည်'(နံနက်ခင်းမှာ ရှင်းစရာ၊ စာ-၁၁၇) လို့ ဆရာတော်ကြီးက ရေးသားထားပါတယ်။
အင်္ဂလိပ်တွေရဲ့ ယတြာဓာတ်ရိုက်ကို မြန်မာတို့ဘက်က ပြန်လည်ချေပ ခဲ့တာတွေလည်းရှိတယ်လို့ဆိုပါတယ်။
အဲဒါတွေကတော့ 'မင်းသားဖိုးစိန်ကြီး ဇာတ်ထဲက လူရွှင်တော်အောင်မောင်း
ကြီးကို တစ်စင်ထောင်ကာ တစ်ဇာတ်ဖွဲ့စေကာ ကပြကြစေပါသည်။ ထိုစဉ် မင်္ဂလာအောင်မောင်းကြီး၏ ဇာတ်အဖွဲ့ထဲမှာ ဓာတ်ပိုင်ပုဂ္ဂိုလ်ကြီးနှစ်ဦး သာမန်လူသားအဖြစ်ဖြင့် လိုက်ပါကာ ဝါးလက်ခုပ်တီးပေးသောနေရာမှနေ အားပေးခဲ့ကြောင်း သိရပါသည်။ ယင်းမှာ အောင်မောင်းဆိုသည်က အောင်မြင်စွာ မောင်းထုတ်ပစ်ခြင်းပါ။ ဝါးလက်ခုပ်တီးပေးသည်က နောက်ခံအားပေးခြင်းကိစ္စပါ' (နံနက်ခင်းမှာ ရှင်း စရာ၊ စာ-၁၁၈)
'တစ်ဖန် အင်္ဂလိပ်တို့ မြန်မာပြည် တစ်ပြည်လုံး ဖြန့်သုံးစေသော ငွေများ ကိုလည်း ဓာတ်ပိုင် လူသူတော်ကြီးတစ်ဦးစေလွှတ်ကာ မုံရွာတစ်ဖက်ကမ်းရှိ ပုလဲနယ် ဖိုဝင်တောင်ပေါ်တွင် မီးရှို့ဖျက်ဆီးပစ်စေခဲ့ပါသည်။ ယင်းမှာ ... အင်္ဂလိပ်တို့ အကွက်ရိုက်ထားသည်ကို တန်ပြန် ယတြာချေပစ်ခြင်းဖြစ်ပါသည်' (နံနက်ခင်းမှာ ရှင်း စရာ၊ စာ-၁၂ဝ)
မြန်မာတွေရဲ့က ဓာတ်ယတြာချေတယ်၊ ဘာကြောင့် မအောင်မြင်လဲ ဆိုရင် အင်္ဂလိပ်ရဲ့ ဓာတ်ယတြာတွေ ခုခံနေတဲ့အတွက်ကြောင့်ဖြစ်ပြီး အင်္ဂလိပ်တွေ ဘက်ကလည်း ဓာတ်ယတြာဆင်တယ်၊ ဘာကြောင့် ကြာကြာမခံလဲဆိုရင် မြန်မာတွေရဲ့ ဓာတ်ယတြာတွေကြောင့်ဖြစ်တယ်လို့ ဆိုပါတယ်။
■နိမိတ်ဆိုးကို ပရိတ်တန်ခိုးနဲ့ ချေပမယ်
ဓာတ်ရိတ် ဓာတ်ခင်းတွေမှာ ဗုဒ္ဓဓာတ် ဓမ္မဓာတ် သံဃဓာတ်တို့ဖြင့် စီ ရင်ထားတဲ့ 'ပုဗ္ဗဏသုတ်'ကား အထက်၏ အထက်ဆုံးလို့ ဆရာတော်ကြီးက ရေးသားခဲ့ကြောင်း အထက်မှာ ဆိုခဲ့ပြီးပါပြီ။
ပရိတ်နဲ့ပတ်သက်တဲ့ ဆရာတော်ကြီးရဲ့ ဖွင့်ဆိုရှင်းပြချက်ကို တင်ပြချင် ပါတယ်။
'ပရိတ်သည် အရံအတား။
သို့ကြောင့် ဓာတ်ရိုက်၊ ယတြာတို့နှင့်အလား ဆင်၏။ ဓာတ်ရိုက်ခြင်းကား မိမိအတွက် အရံအင်အား။ ယတြာချေခြင်းကား တစ်ဖက်ကိုတား ခုခံချေပခြင်း များ။
ဤပရိတ်တော်များ၌လည်း ...
(က) မိမိအတွက် တစ်ဖက်တားဆီး ခုခံချေပနည်းများလည်းပါ၏။
(ခ) မိမိအတွက် တစ်ဖက်သို့ ဓာတ်ရိုက်နည်းများလည်းပါ၏။
(ဂ) မိမိအတွက် တားလည်းတား ဓာတ်ရိုက်ကစားနည်းများလည်းပါ၏။
ထိုစဉ် ...
(က) ရတနာ့သုတ်၊ မောရသုတ်၊ ဝဋ္ဋသုတ်၊ ဓဇဂ္ဂသုတ်၊ အာဋာနာဋိယ သုတ်၊ အဂုၤလိမာလသုတ်၊ ပုဗ္ဗဏသုတ် ဤခုနှစ်သုတ်တို့သည် ခုခံချေပ အတားပြသော သုတ်များဖြစ်ပါသည်။
(ခ) မေတ္တသုတ်၊ ခန္ဓသုတ် ထိုနှစ်သုတ်ကား မေတ္တာဖြင့် ဓာတ်ရိုက်၍ မိမိအတွက် အရံအင်အားဖြစ်လာစေသော သုတ်များဖြစ်ကြပါသည်။
(ဂ) မင်္ဂလသုတ်၊ ဗောဇ္ဈင်္ဂသုတ် ထိုနှစ်သုတ်ကား အတားဆိုလည်းဟုတ် အရံအင်အားဆိုလည်း ဟုတ်တေသော သုတ်များပင်' (နံနက်ခင်း မှာရှင်းစရာ၊ စာ-၁ဝ၂)လို့ ဆရာတော်ကြီးက ဖွင့်ဆိုရှင်းပြထားပါတယ်။
ပုဗ္ဗဏသုတ်ကို ရွတ်ဆိုရင်းက မကောင်းသောနိမိတ်ဆိုး၊ မကောင်းသော အိပ်မက်ဆိုး၊ မကောင်းသော ငှက်ဆိုးထိုးသံ ... စကတဲ့ မကောင်းတဲ့ အတိတ်နိမိတ်ဆိုးတွေကို ဗုဒ္ဓဓာတ်ယတြာနဲ့ ချေဖျက်ကျော်လွှားနိုင်ဖို့အတွက် လမ်းညွှန်ပေးရင်းကပဲ ဓာတ်အကြောင်း၊ ယတြာများအကြောင်းကို ဖွင့်ဆိုရှင်းပြ တော်မူခဲ့တယ်လို့ ဆိုရမှာဖြစ်ပါတယ်။
■ ရတနာ၏ ယတြာ မည်သည့်အရာမျှ မတုယှဉ်သာ
ယတြာကောင်းရင် မင်းလောင်းတောင် ပျောက်ရတယ်ဆိုတဲ့ စကားဟာ နေ့စဉ်ဘဝတွေထဲမှာ မကြာခဏဆိုသလို ကြားနေရတဲ့ စကားပဲဖြစ်ပါတယ်။ ဆရာတော်ကြီးကတော့ 'ယတြာကောင်းရင် မင်းလောင်းတောင် ကျေပျောက် ရ၏။ ယတြာကောင်း မင်းကောင်းလည်း ကျေပျောက်ရ၏' လို့ တစ်ဆင့်တက် ဖွင့်ဆိုပြတာကိုလည်းတွေ့ရပါတယ်။
ဓာတ်၊ ယတြာတွေနဲ့ပတ်သက်ပြီး ဆရာတော်ကြီးက .. 'သည်မျှ ဓာတ် ခိုင်လှသော ဓာတ်ယတြာများတွင် ပရိတ်တော်လာ ဗုဒ္ဓဓာတ်၊ ဓမ္မဓာတ်၊ သံဃာ့ဓာတ်တို့ဖြင့် တန်ပြန်ချေပခြင်း၊ မေတ္တာဓာတ်ဖြင့်
အခြေစိုက် ဓာတ်ရိုက်ခြင်းသည် အားလုံးထက် အစွာဆုံးတည်း။
အကြောင်းမှာ ဗုဒ္ဓအရင်းခံသော ရတနာ့ဓာတ်သက်များသည် ပါရမီတော် နောက်ခံအား ထုထည်ကြီးမားခြင်း၊ ညစ်ကြေးမတင် သန့်ပြန်စင်ကြယ်နေတော့ခြင်း၊ တိုးလျှင် ပြန်လှန် ခံလျှင် အပြီးချေဖျက်နိုင်ခြင်းများကြောင့်ပင်။
ဗုဒ္ဓဓာတ်အမှီရထားသော မေတ္တာဓာတ်သည်လည်း ရာဂ၊ ဒေါသများ ကင်းစင်နေသဖြင့် တစ်ဖက်မီး မိမိ၌ မကူးစက်နိုင်တော့ခြင်း၊ မိမိ၏ မေတ္တာ ဓာတ်ကြောင့်လည်း တစ်ဖက်ရှိ ရာဂမီး၊ ဒေါသမီး ငြိမ်ကျသွားတော့စေခြင်းများကြောင့်ပင်။
သို့ကြောင့် ပရိတ်တော်လာ ဤဓာတ်ရိုက် ယတြာချေနည်းများကို ရတနာ ကိုင်မည့် မိမိသည်
- သရဏဂုံတည် သီလ၌တည်နေပြီ၊
- ပါဠိအက္ခရာမဖျက် ရွတ်ဖတ်လျှက်ကရှိနေပြီ၊
- မိမိကိုယ်တိုင်ရွတ်ဖတ်နေသည့် ပါဠိတော်၏ အဓိပ္ပါယ်ကိုလည်း သိရှိနေပြီ၊
- မေတ္တာစိတ်လည်း ကိန်းတည်နေပြီ၊
ဤ 'ပြီလေးပြီ'အရင်းတည်ဖြင့် ရွတ်ပွားပါက မိမိ၌ တခြားသော ဓာတ် မလို၊ ယတြာမလိုတော့ပါ။ အခြားအခြားသော လောကီအစီအမံများလည်း ဘာမျှမလိုတော့ပါ။
ရတနာ၏ ယတြာသည် မည်သည့်အရာမျှ မတုယှဉ်သာသောကြောင့် တည်း။ မေတ္တာဓာတ်သက် မည်သည့်အရာကမျှ မသက်ဖြတ်ရဲသောကြောင့်တည်း။'(နံနက်ခင်းမှာရှင်းစရာ၊ စာ-၁၂၁) လို့ ရေးသားတော်မူခဲ့ပါတယ်။
ကျေးဇူးတော်ရှင် မဟာဗောဓိမြိုင်ဆရာတော်ကြီးရဲ့ စာပေတွေကို ဖတ်မှတ် ကြည်ညိုတဲ့အခါမှာ ထူးခြားဆန်းကြယ်မှုတွေနဲ့ သိမ်မွေ့နက်နဲမှုများစွာရှိတာကို တွေ့ရပါတယ်။ အခုဒီစာစုမှာဖော်ပြထားတဲ့ ပုဗ္ဗဏသုတ်ကို ဓာတ်ယတြာ ရှုထောင့်မှ ဖွင့်ဆိုပြတဲ့ဆိုတဲ့ဖွင့်ဆိုချက်နှင့် ဓာတ်အကြောင်း၊ ယတြာများ အ ကြောင်းများဟာ မဟာဗောဓိမြိုင်ဆရာတော်ကြီးရေးသားတဲ့ စာပေကျမ်းစာအုပ် များမှာတွေ့ရတဲ့ အယူအဆထူးများစွာထဲမှ တစ်ခုသာဖြစ်သည်ဟု မှတ်ယူ ယုံကြည်ပါကြောင်း ...။
ငြိမ်းချမ်းသာ
စာပြီးရက်စွဲ/- ၂၇-၁-၂ဝ၂ဝ
ရည်ညွှန်းကိုးကား/-
၁။ 'အသွားမတော်တစ်လှမ်း [လေခက္ခန္ဓကထာ]
၂။ နံနက်ခင်းမှာရှင်းစရာ
No comments:
Post a Comment