စိတ်ကိုစောင့်ရှောက်ကြောင်း လေးပါးကုန်သော ကမ္မဋ္ဌာန်းတရားများ
စတုရာရက္ခကမ္မဋ္ဌာန = စိတ်ကိုစောင့်ရှောက်ကြောင်း လေးပါးကုန်သော ကမ္မဋ္ဌာန်းတရားများ
- ဗုဒ္ဓါနုဿတိ ဗုဒ္ဓါနုဿတိ ပွားများနေသောသူသည် ဗုဒ္ဓမြတ်စွာ သာသနာတော်ကို ပို၍ ကြည်ညိုသောကြောင့် မိမိအတွက် သာသနာညှိုးနွမ်းဖွယ်ကိစ္စကို မပြုတော့။ သာသနာ တိုးတက်ကြီးပွားကြောင်း, ကျက်သရေရှိကြောင်း အလုပ်ကိုသာ စွမ်းနိုင်သမျှ အားထုတ်တော့သည်။
- မေတ္တာ မေတ္တာဘာဝနာ ပွားများလေ့ရှိသူကား အရာရာ၌ ကိုယ်ကျိုးကို ရှေ့ရှုမထားဘဲ သူတစ်ပါးအကျိုးကိုသာ ရှေ့ရှု၍ အလုပ်လုပ်၏ ။ ထိုသို့ရှေ့ရှုသောကြောင့်ပင် သာသနာနှင့်စပ်၍ အကျိုးမဲ့ ကုန်ကျဖွယ်များကို မိမိလည်း မသုံးဖြုန်း ။ သူတစ်ပါးတို့ကိုလည်း မသုံးဖြုန်းစေတော့။
- အသုဘဘာဝနာ အသုဘဘာဝနာသည် သာသနာနှင့် လွန်စွာသင့်လျော်၏။ အသုဘဘာဝနာကဲ့သို့ ဘာဝနာတစ်မျိုးမျိုးသာ လက်ကိုင်မရှိပါမူ လောကီအာရုံကာမဂုဏ်ဘက်၌ အသက်ကြီးသော်လည်း စိတ်ရောက်လျှက် ရှိတတ်သေး၏။ ထို့ကြောင့် အသုဘဘာဝနာကို ကောင်းစွာပွားများသူသာ စိတ်ထားဖြူလွင် သူတော်စင် ဖြစ်နိုင်ပေသည်။
- မရဏဿတိ သေခြင်းတရားကို နှလုံးသွင်းမှု နေ့စဉ်ပြုလျှင် “ယနေ့ သေမည်လား, မနက်ဖြန် သေမည်လား မသိရ။ သေသွားသောအခါ ကုသိုလ်သာလျှင် အားကိုးရာရှိပါတကား" ဟု အမြဲသတိရနေသောကြောင့် ကုသိုလ်ကောင်းမှု ကိစ္စစုကို တစ်ခုပြီးတစ်ခု ဘာဝနာပွားမှုတိုင်အောင် အမြဲပြု၍ နေပေလိမ့်မည်။
- ထို့ကြောင့် ဤကမ္မဋ္ဌာန်းလေးပါးကို “စတုရာရက္ခ"ဟု နာမည်ထူးတပ်လျှက် ရှေးသူတော်မြတ်တို့ အမြဲအားထုတ်အပ်ခဲ့ပေသတည်း။
မဟာဂန္ဓာရုံ ဆရာတော်ကြီး
Crd - အရှင်ခေမန္ဒ
No comments:
Post a Comment