❒ ဗုဒ္ဓဘာသာဝင်တွေ အဓိဋ္ဌာန်ဝင်ပြီး ဆုတောင်းတာ အဓိပ္ပါယ်ရှိသလား

လူငယ်တွေ ဘာသာရေးနဲ့ပတ်သက်ပြီး မေးမြန်းကြတဲ့ မေးခွန်းတွေကို အောက်စဖို့ဒ်ဆရာတော် ပါမောက္ခဒေါက်တာဓမ္မသာမိရဲ့ တက္ကသိုလ်တွေမှာ ပြုလုပ်တဲ့ တရားသင်တန်းတွေ၊ တရားပွဲတွေမှာ ထင်ထင်ရှားရှားတွေ့ရလေ့ ရှိပါတယ်။ လူငယ်တွေရဲ့အသံ (ဝါ) တက္ကသိုလ်ကျောင်းသားကျောင်းသူတွေ ရဲ့မေးခွန်းတွေကို အားစိုက်နားထိုက်တဲ့အခါမှာ သိချင်လို့မေးတဲ့ မေးခွန်းတွေ တွေ့ရသလို ဝိရောဓိဖြစ်နေတာကြောင့် မေးတဲ့မေးခွန်းတွေကိုလည်းပဲ တွေ့ ရပါတယ်။ ဒါ့အပြင် ယုံကိုမယုံဘူးဆိုတဲ့ သံသယစိတ်ကြီးကြီးနဲ့ 

မေးတဲ့မေးခွန်းတွေကိုလည်းပဲ တွေ့ရလေ့ရှိပါတယ်။ 

ဘယ်လိုပဲဖြစ်ပါစေ မေးခွန်းတွေ  များလာခြင်းဟာ ကောင်းတဲ့ဓလေ့ဖြစ် တယ်လို့ ကျွန်တော်ကတော့ ယုံကြည်ပါတယ်။ လူငယ်တွရဲ့ စူးစမ်းရှာဖွေမှု အတွက် ထိုက်တန်တဲ့အဖြေတွေပေးနိုင်မှသာလျှင် အဲဒီဓလေ့ကောင်းက ထွန်းကားရှင်သန်လာမှာဖြစ်ပြီး လူငယ်တွေရဲ့ ရင်ထဲမှာလည်း ဘာသာတရားနဲ့ပတ် သက်ပြီး လေးစားတန်ဖိုးထားတဲ့စိတ်တွေ ပိုပြီး အားကောင်းလာမှာဖြစ်ပါတယ်။

၂ဝ၂ဝ ခုနှစ် ဇန်နဝါရီလ ၅ ရက်နေ့က ရန်ကုန်နည်းပညာတက္ကသိုလ်မှာ ကျင်းပပြုလုပ်ခဲ့တဲ့ 'မုဒိတာဦး နှောက်ဖြင့် မုဒိတာတိုင်းပြည်တည်ဆောက်ခြင်း' 

ဆိုတဲ့ အောက်စဖို့ဒ်ဆရာတော်ရဲ့ တရားသင်တန်း အမေးအဖြေကဏ္ဍမှာ လူငယ် စိတ်အပြည့်နဲ့မေးထားတဲ့ မေးခွန်းတစ်ခုကို အခုလိုတွေ့ရပါတယ်။

'ရိုသေစွာလျှောက်ထားအပ်ပါသည်ဘုရား။ တပည့်တော်တို့ ဗုဒ္ဓဘာသာ ဝင်တွေမှာ အဓိဋ္ဌာန်ဝင်၍ လိုရာဆုတောင်းခြင်း၊ ပဋ္ဌာန်းရွတ်၍ လိုရာဆုတောင်း ခြင်း၊ မည်သည့်ဘုရား မည်သည့်ပုတီး မည်မျှစိပ်၍ လိုရာဆုတောင်းခြင်း စတာတွေက အဓိပ္ပါယ်ရှိပါသလားဘုရား။ မိမိအတွက် တကယ်ကောင်းကျိုး ပေးသည်ဖြစ်စေ သို့မဟုတ် အကုသိုလ်မဖြစ်သည်နှင့် ဗုဒ္ဓဘာသာစစ်တစ် ယောက်အနေနဲ့ အထက်ဖော်ပြပါအရာများ လွှဲမှားနေသည်ဆိုလျှင် လုပ်သင့်ပါ သလားဘုရား' ... တဲ့။

အဓိဋ္ဌာန်ဝင်ပြီး လိုရာဆုတောင်းတာ အဓိပ္ပါယ်ရှိရဲ့လားတဲ့၊ ပဋ္ဌာန်းရွတ်၊ ပုတီးစိပ်ပြီး လိုရာဆုတောင်းတာ အဓိပ္ပါယ်ရှိရဲ့လား .. တဲ့။ 

လူငယ်စိတ်မှာ ကပ်ပြီးပေါက်နေတဲ့ သံသယညောင်ပင်ငယ်လေးက အန္တရာယ်တွေအပြည့်နဲ့။ အဲဒီ သံသယတွေကို အောက်စဖို့ဒ်ဆရာတော်က ကရုဏာစိတ်ကြီးကြီးနဲ့ အဖြေပေးပုံကလည်း ပညာတွေအပြည့်နဲ့။

'အဓိဋ္ဌာန်ဝင်ပြီးတော့ လိုရာဆုတောင်းတယ်ဆိုတာ အခန်းကဏ္ဍတစ်ဏ္ဍစီ။ တစ်ခုက အဓိဋ္ဌာန်ဝင်တာ၊ တစ်ခုက လိုရာဆုတောင်းတာ။ လိုရာဆုတောင်း တာက သူ့ရဲ့ incentive(မက်မောလောက်တဲ့အခွင့်အလမ်း)ဖြစ်ပြီး အဓိဋ္ဌာန် ဝင်တာကတော့ ကောင်းတဲ့အလုပ်' လို့ ဆရာတော်က 'အဓိဋ္ဌာန်ဝင်ဆုတောင်း ခြင်း'မှာ မတူညီတဲ့ အခြေအနေနှစ်ရပ်ရှိကြောင်းကို ဦးစွာရှင်းပြပါတယ်။

(က)#အဓိဋ္ဌာန်ဝင်ခြင်းနဲ့ (ခ)#ဆုတောင်းခြင်းဆိုတဲ့ အခြေအနေနှစ်ရပ်ကို ဘယ်လိုစိတ်ထားမျိုးနဲ့ ပြုလုပ်နေသလဲဆိုတာကို သိမှသာလျှင် 'အဓိဋ္ဌာန်ဝင်ပြီး လိုရာဆုတောင်းတာ အဓိပ္ပါယ်ရှိရဲ့လား'ဆိုတဲ့ မေးခွန်းရဲ့ အဖြေကိုရနိုင်မှာ ဖြစ်ကြောင်း ဆရာတော်က ဆက်ပြီးရှင်းပြပါတယ်။

ဗုဒ္ဓတရားတော်မှာ ရှိပြီးဖြစ်တဲ့ အကြောင်းအရာများကို Clinical Psychology (လက်တွေ့စိတ်ပညာ)က ပုံစံတစ်ခုအနေနဲ့ သုံးပြီး ရှင်းပြထားတာ ရှိကြောင်းနဲ့ စိတ်က အာရုံပြုတဲ့အပေါ်မူတည်ပြီး ခွဲခြားထားတာဖြစ်ကြောင်း ဆရာတော်က ဆိုပါတယ်။ ဆရာတော် ဟောပြောရှင်းပြခဲ့တဲ့ စိတ်အခြေအနေတွေကို ပိုပြီးလွယ်လွယ်ကူကူမြင်သာအောင် တင်ပြပုံတစ်မျိုးနဲ့ ပြန်လည်ဖော် ပြလိုပါတယ်။ အဲဒီလိုဖော်ပြတဲ့နေရာမှာ အမှားအယွင်းတစ်စုံတစ်ရာရှိခဲ့ရင်တော့  အောက်စဖို့ဒ်ဆရာတော်နဲ့သက်ဆိုင်ခြင်းမရှိဘဲ ကျွန်တော်ရဲ့ တာဝန်ရှိကြောင်း ကိုလည်း ပြောလိုပါတယ်။ ဆရာတော်က စိတ်ရဲ့အခြေအနေတွေကို အခုလို  ရှင်းလင်းပြထားပါတယ်။

(က)Threat-Focused Mind (အကြောက်တရားကမောင်းနှင်တဲ့စိတ်)

ပထမဆုံးတစ်ခုကတော့Threat-Focused လို့ခေါ်ပါတယ်။ 

ကြောက်စိတ်ကိုအာရုံပြုပြီး တစ်ခုခုလုပ်တာပါ။ ဥပမာ ကြောက်လို့ စာကျက်တာမျိုးပါ။ သူများအထင်သေးမှာစိုးလို့ စာကျက်တာမျိုးပါ။ အဲဒီမှာ စာကျက်တာက ကောင်းပြီး ကြောက်တာက ဆိုးပါတယ်။ အကြောက်တရားက မောင်းနှင်တဲ့ စိတ်နဲ့ အလုပ်လုပ်မယ်ဆိုရင် အကောင်းအဆိုးရောနေတာကြောင့် ရာနှုန်းပြည့် ကောင်းတယ်လို့ ဆိုလို့မရနိုင်ပါဘူး။

ဒါကိုသိပ္ပံနည်းကျရှင်းမယ်ဆိုရင် အကြောက်တရားကမောင်းနှင်တဲ့စိတ် နဲ့ တစ်ခုခုကိုအာရုံပြုအလုပ်လုပ်တယ်ဆိုရင် ခန္ဓာကိုယ်က #ကောတီဆောဟိုမုန်း (cortisol hormone)တွေ ထုတ်ပါတယ်။ ကောတီဆောဟိုမုန်းဆိုတာက အာရုံကြောဆိုင်ရာ ဓာတုပစ္စည်းတစ်မျိုးပါ။ သူက စိတ်ဖိစီးမှုကို တုံ့ပြန်နေတဲ့ အချိန်အတွင်းမှာ ထွက်တတ်ပြီး ကျောက်ကပ်အထက်နားမှာရှိတဲ့ #အဒရီနယ်အကျိတ်(adrenal glands)က ထုတ်ပေးတာဖြစ်ပါတယ်။ အဲဒီဟိုမုန်းရဲ့ လုပ်ဆောင်ချက်ကတော့ ဦးနှောက်မှာရှိတဲ့ #အမိတ်ဒလာ(Amygdala)ကိုနှိုးပြီး  #ဟစ်ပိုကမ်းပတ်စ်(ံHippocampus)ကို ဟန့်တားတာပါပဲ။

ဒီနေရာမှာ ထပ်ပြီးရှင်းရမှာက #အမိတ်ဒလာနဲ့ #ဟစ်ပိုကမ်းပတ်စ်ပါ။ #ဟစ်ပိုကမ်းပစ်က လေ့လာမှုနဲ့ မှတ်သားမှုပိုင်းကို အဓိကတာဝန်ယူလုပ်ဆောင်တာ ဖြစ်ပြီး #အမိတ်ဒလာကတော့ ကြောက်ရွံ့ခြင်း၊ စိုးရိမ်ခြင်း ..စတဲ့ စိတ်ပိုင်း ဆိုင်ရာ တုံ့ပြန်မှုတွေကို အဓိကပြုလုပ်တာပါ။ #အမိတ်ဒလာဟာ မကောင်းတော့ဘူးဆိုတဲ့ စိတ်ခံစားမှုရဲ့ အချက်ပေးခေါင်းလောင်းသံဖြစ်ပြီး တိုက်ခိုက်ဖို့ ဒါမှမဟုတ် ထွက်ပြေးဖို့ အလုပ်လုပ်တဲ့ ဦးနှောက်ရဲ့ အစိတ်အပိုင်းဖြစ်ပါတယ်။ ဟစ်ပိုကမ်းပတ်စ်ကတော့ မှတ်ဉာဏ်အသစ်တွေဖွဲ့စည်းပြီး ခြိမ်းခြောက်မှုအသစ်တွေ ကိုရှာဖွေတဲ့ ဦးနှောက်ရဲ့အစိတ်အပိုင်းဖြစ်ပါတယ်။ ပိုပြီးရှင်းအောင်ပြော ရမယ်ဆိုရင်တော့ #အမိတ်ဒလာက ခံစားချက်နဲ့အလုပ်လုပ်ပြီး #ဟေပိုကမ်းပတ်စ်က အချက်အလက်နဲ့ အလုပ်လုပ်တာပါ။

ဆိုတော့Threat-Focus လို့ခေါ်တဲ့ အကြောက်တရားကမောင်းနှင်တဲ့စိတ် နဲ့ (ဝါ) အကြောက်တရားကို အခြေခံတဲ့စိတ်အခြေအနေနဲ့ ကိစ္စရပ်တစ်ခုခုကို ပြုလုပ်မယ်ဆိုရင်တော့ အဲဒီပုဂ္ဂိုလ်မှာ ပျော့ကွက်တွေ၊ အားနည်းချက်တွေ ရှိ နေဦးမှာပဲလို့ ဆရာတော်က မိန့်ကြားတော်မူပါတယ်။ ပျော့ကွက်၊ အားနည်း ချက်တွေရှိတဲ့အတွက် သူများဝေဖန်တာကို မခံနိုင်ဘူးလို့လည်း ဆိုပါတယ်။ ဒါက စိတ်အခြေအနေတစ်ရပါ။

(ခ) Incentive-focused Mind (မက်လုံးကမောင်းနှင်တဲ့စိတ်)

ဒုတိယတစ်ခုကတော့ Incentive-focused Mind လို့ခေါ်ပါတယ်။ မြန်မာလို မက်လုံးကမောင်နှင်တဲ့စိတ်လို့ပဲ ဆိုကြပါစို့။ သူက ဆုလာဒ်တွေကိုတွေးပြီးတော့ ကြိုးစားတာမျိုးပါ။ 'စာမေးပွဲအောင်ရင် လိုချင်တာဝယ်ပေးမယ်'ဆိုတဲ့ မိဘရဲ့ ကတိကို ရည်စူးပြီး စာမေးပွဲအောင်အောင် ကြိုးစားတာမျိုးပေါ့။

ဆန်လိုချင်လို့ ဆီပေးတာမျိုးနဲ့လည်းဆင်ပါတယ်။ လူတစ်ယောက်က ကံကောင်းချင်လို့ ငါးပါးသီလဆောက်တည်တယ်ပဲ ဆိုပါတော့။ ငါးပါးသီလ ဆောက်တည်တာ တခြားလူတွေအတွက်လည်းကောင်းတယ်၊ သူ့အတွက်လည်း ကောင်းတယ်။ ဆိုးတာက လောကကိုအခြေခံနေတဲ့ စိတ်နေစိတ်ထားပါ။

အဲဒီလိုမက်လုံးက မောင်းနှင်တဲ့စိတ်နဲ့တစ်ခုခုကို လုပ်နေမယ်ဆိုရင် 

#ဒိုပါမင်း (Dopamine) ဆိုတာကို ထုတ်ပါတယ်။ ဒိုပါမင်းဆိုတာက နျူရိုမော် ဂျူလေတာပါ။ ဒိုပါမင်းက ဆုလာဘ်တွေ၊ အာရုံစိုက်မှုတွေပတ်သက်ပြီး ချဉ်းကပ်သောအပြုအမှုတွေကို မြှင့်တင်ပေးတယ်လို့ ဆိုပါတယ်။

(ဂ) Affiliative-focused Mind(အများအကျိုးလိုလားတဲ့စိတ်)

အများအကျိုးလိုလားတဲ့စိတ်ကတော့ ရှေ့ကဖော်ပြခဲ့ပြီဖြစ်တဲ့ စိတ်အခြေ အနေနှစ်ရပ်နဲ့ကွာခြားပါတယ်။ 

ကျောင်းသားတစ်ယောက်ကိုပဲ ဥပမာအနေနဲ့ကြည့်ရအောင်ပါ။ 

သူက အများအကျိုးလိုလားတဲ့စိတ်နဲ့ ကျောင်းသားဆိုပါတော့။ သူစာကျက်တဲ့အခါမှာ 

(၁)Threat-Focused(အကြောက်တရားကမောင်းနှင်တဲ့စိတ်)နဲ့ကလေး  တစ်ယောက်စာကျက်နေသလိုမျိုး သူများအထင်သေးမှာကြောက်လို့ စာကျက် တာမဟုတ်ဘူး၊ စာမေးပွဲကျမှာ ကြောက်လို့စာကျက်တာမဟုတ်ဘူး၊ 

(၂)Incentive-focused(မက်လုံးကမောင်းနှင်တဲ့စိတ်)နဲ့ ကျောင်းသား စာကျက်နေသလိုမျိုး စာမေးပွဲအောင်ရင် လိုချင်တာဝယ်ပေးမယ်ဆိုတဲ့ ကတိ ကဝတ်သူ့ရဲ့မိဘတွေဆီက ရလို့စာကျက်တာလည်း မဟုတ်ဘူး။ သူစာကျက်တာဟာ 'ဆင်းရဲပြီး ကျန်းမာရေးချို့တဲ့ အောက်ခြေလူတန်းစားတွေကို ကျန်းမာရေးစောင့်ရှောက်ပေးနိုင်ဖို့'ဆိုတဲ့Affiliative-focused (အများအကျိုး လိုလားတဲ့စိတ်)စာကျက်တာသာ ဖြစ်တယ်။

စိတ်နေစိတ်ထားကိုAffiliative-focused (အများအကျိုးလိုလားတဲ့စိတ်) ထားတဲ့အချိန်မျိုးဆိုရင် #အောက်ဆီတော်ဆင်oxytocin ထုတ်ပေးပါတယ်။ အောက်စီတော်ဆင်ဆိုတာ နျူရိုပက်ပတိုက်ဖြစ်ပါတယ်။ အောက်စီတော်ဆင်က ကလေးငယ်များအတွက် အမူအကျင့်တွေကို ပြုစုပျိုး ထောင်မှုနဲ့ ဖိုမစုံတွဲတွေရဲ့ သံယောဇဉ်ချည်နှောင်မှုကိုမြှင့်တင်ပေးပါတယ်။ ပျော်ရွှင်မှု၊ ချစ်ခြင်းမေတ္တာတွေနဲ့ ဆက်စပ်နေပြီး အမျိုးသမီးတွေမှာရှိတဲ့ အောက် ဆီတော်ဆင်က အမျိုးသားတွေထက် ပိုများတယ်လို့လည်း ဆိုပါတယ်။ မိခင်က ကလေးကို နို့ချိုတိုက်တဲ့အခါ၊ ကလေးကိုစောင့်ရှောက်တဲ့အခါဖြစ်တဲ့ ဟော်မုန်း က အောက်ဆီတော်ဆင်ထုတ်တယ်လို့လည်း ဆိုပါတယ်။

အဲဒီစိတ်နေသဘောထားသုံးရပ်ကို ထပ်ပြီးအနှစ်ချုပ်မယ်ဆိုရင် Threat-focused (အကြောက်တရားကမောင်းနှင်တဲ့စိတ်)က ဒေါသ၊ Incentive-focused(မက်လုံးကမောင်းနှင်တဲ့စိတ်)က လောဘဖြစ်ပြီးAffiliative - focused (အများအကျိုးလိုလားတဲ့စိတ်)က ကရုဏာဖြစ်ပါတယ်။

အောက်စဖို့ဒ်ဆရာတော် ပါမောက္ခဒေါက်တာဓမ္မသာမိက ... 'ကရုဏာကို မြတ်စွာဘုရားက သောဘနစေတသိက်တဲ့။ သောဘနစေတသိက်ဆိုတာ ပါဠိလိုပေါ့။ အင်္ဂလိပ်လိုBeatiful Heart  တဲ့။ လှပတဲ့ နှလုံးသား တဲ့။ အများအတွက်တွေးပြီးတော့မှ စာကျက်တာ၊ အများအတွက် တွေးပြီးတော့မှ အဓိဋ္ဌာန်လုပ်တာဆိုရင် သိပ်ကောင်းတယ်' လို့ ရှင်းပြတော်မူပါတယ်။

ဆိုတော့ ဒီစာစုရဲ့အစမှာ ဖော်ပြထားတဲ့ 'အဓိဋ္ဌာန်ဝင်ပြီး လိုရာဆုတောင်း တာ အဓိပ္ပါယ်ရှိရဲ့လား'ဆိုတဲ့ မေးခွန်းကို ပြန်ကောက်ရရင်  မေးခွန်းက မပြည့်စုံဘူးလို့ ပြောရမှာဖြစ်ပါတယ်။

အဓိဋ္ဌာန်ဝင်ပြီးလိုရာဆုတောင်းတာ အဓိပ္ပါယ်ရှိ၊ မရှိဆိုတာကို ဖြေကြားဖို့ အတွက် ဘယ်လိုစိတ်နေသဘောထားမျိုးနဲ့ အဓိဋ္ဌာန်ဝင်ပြီး ဘယ်လိုဆုမျိုးကို တောင်းနေသလဲဆိုတာကို ကျွန်တော်တို့တတွေ ပြန်ကြည့်ကြရဦးမှာပါ။

'အဓိဋ္ဌာန်လုပ်တဲ့နေရာမှာ ဘာလိုချင်၊ ညာလိုချင်တယ်။ အဲဒီလိုဆိုရင်  incentive-focused မှာပါသွားတယ်။ ဘာကို ကြောက်လို့လုပ်တယ်ဆိုရင်လည်း threat-focused ထဲမှာပါသွားပြီ' လို့ ဆရာတော်က ရှင်းပြတော်မူပါတယ်။ ဒါ့အပြင် 'ဘာလိုချင်လို့ အဓိဋ္ဌာန်လုပ်တယ်ဆိုတာ လုံးလုံးလျားလျား မကောင်းတာတော့ မဟုတ်ပါဘူး။ ပြင်စရာလိုတာက စိတ်ထားထားပါ။ ဘာကြောင့်လုပ်တယ်ဆိုတဲ့ စိတ်ထားကလေးကို ပြင်ရမှာ'လို့ ဆုံးမတော် မူပါတယ်။

ကျွန်တော်တို့ ရင်ဆိုင်ဖြတ်သန်းရတဲ့ခေတ်ကြီးမှာ 

စားဝတ်နေရေးအတွက်   ရုန်းကန်ရခြင်းဆိုတဲ့ ဝန်ထုပ်ဝန်ပိုးကြီးက ကြီးလှပါတယ်။ အဲဒီဝန်ကို ထမ်းရင်းကပဲ မိဘတွေက သားသမီးတွေကို ဘာသာရေးအမွေ မပေးနိုင်တော့တာမျိုး (ဝါ) ပေးဖို့အားနည်းလာတာမျိုးတွေ ကြုံနေရပါတယ်။ 

လူငယ်တွေခမျာလည်း ဘာမှန်းမသိအောင်မြန်လှတဲ့ ခေတ်ကြီးကို ငေးကြည့်ရင်းက စိတ်အချဉ်ပေါက်တာမျိုးတွေ ရှိနေနိုင်တာပါပဲ။ အဲဒီစိတ်အချဉ်ပေါက်မှုထဲမှာ ယုံကြည်ကိုးကွယ်မှုတွေတောင် ပါကောင်းပါနေနိုင်ပါတယ်။ ယုံကြည်ကိုးကွယ်မှုနဲ့ပတ်သက်ပြီး သူတို့ရင်ထဲက သံသယတွေ၊ သူတို့မေးလာတဲ့မေးခွန်းတွေကို ပြေလည်အောင် မဖြေရှင်းနိုင်ခဲ့ရင် ဘာကိုမှမယုံကြည်တော့တဲ့ ဘာသာမဲ့တွေတောင် ဖြစ်သွားနိုင်ပါတယ်။ ဒီအတွက် လူငယ်တွေရင်ထဲမှာရှိနေနိုင်တဲ့အသံကို ကိုယ်စားပြုနိုင်မယ့် မေးခွန်းတွေကို အောက်စဖို့ဒ်ဆရာတော်ရဲ့အဖြေတွေနဲ့ ယှဉ်တွဲပြီး စာစုငယ်လေးများအဖြစ် ပြန်လည်တင်ပြခြင်းဖြစ်ပါတယ်။ 

ကျေးဇူးတော်ရှင်အောက်စဖို့ဒ်ဆရာတော်က 'ပျော်ရွှင်တယ်ဆိုပြီး သူတို့ ကိုယ်သူတို့ မြင်တဲ့ပုဂ္ဂိုလ်တွေဟာ အများအကျိုးဆောင်ရွက်နေတဲ့ပုဂ္ဂိုလ်တွေ။ အများအကျိုးအတွက် များများတွေးပါ'လို့ ဆုံးမတော်မူခဲ့ဖူးပါတယ်။ ဆရာတော်ရဲ့ အဆုံးအမကို လိုက်နာကျင့်သုံးရင်းက ငြိမ်းချမ်းပြီး သိုက်ဝန်းတဲ့လူ့အဖွဲ့ အစည်းဖြစ်လာဖို့အတွက်  ကျွန်တော်တို့တတွေအားလုံး ဝိုင်းဝန်းပြီး ကြိုးစားကြရ မှာဖြစ်ပါကြောင်း။

#ငြိမ်းချမ်းသာ

စာပြီးရက်စွဲ/- ၁၇-၆-၂ဝ၂ဝ

ရည်ညွှန်းကိုးကား

၁။ အောက်စဖို့ဒ်ဆရာတော်ဟောကြားတော်မူသည့်

'မုဒိတာဦးနှောက်ဖြင့် မုဒိတာတိုင်းပြည်တည်ဆောက်ခြင်း'တရားတော်

၂။ ဗုဒ္ဓဦးနှောက်(ဇော်ဝင်းကြူ(ပျဉ်းမနား)၊ မြန်မာပြန်)